Gii máksá

Dulkkat ožžot bálkká dahkkojuvvon soahpamuša mielde. Jus dulka bargá fitnodagas, de sádde dulkonfitnodat rehkega dearvvašvuođadoaimmahahkii bálvalusa ovddas. Jus dulkkas lea priváhta soahpamuš, de oažžu dábálaččat bálkká dearvvašvuođadoaimmahaga bálkávuogádaga bokte. Dearvvašvuođadoaimmahagain lea vuogit man mielde bálká máksojuvvo.

Spesialistadearvvašvuođabálvalus:
Dulkagoluid divššu oktavuođas máksá iešguhtetge dearvvašvuođadoaimmahat.                                            Dearvvašvuođa- ja fuolahusbálvalusat mat geavahit dulkka eambbo go soames hárve háve, galget váldit dulkongoluid mielde iežaset bušeahtaide ja oainnusin dahkat daid iežaset rehketdoaluin. Dulkongolut divššu oktavuođas almmolaš dearvvašvuođaásahusain ja priváhta ásahusain maiguin  Guovlulaš dearvvašvuođadoaimmahagat (dárogiel oanádus: RHF) leat dahkan soahpamuša, galget máksojuvvot ruđain man RHF lea ožžon hálddašeapmái stáhtabušeahta bokte. Dát gullá oktii fuolahanovddasvástádusain ja geatnegasvuođain sihkkarastit doarvái gulahallama dearvvašvuođaásahusa ja pasieantta gaskka. Stáhtalaš ruhtadanortnegat juhket ruđaid dearvvašvuođaregiovnnaide, oasi dárbbu mielde ja oasi doaimmaid mielde, ja dat lea dat ruhtahivvodat mii oktiibuot lea juolluduvvon geavahussii. Dearvvašvuođadoaimmahagat mearridit dasto ieža mo sii siskkáldasat geavahit ruđa, dás maiddái dulkonbálvalussii.

Suohkandearvvašvuođabálvalus:
Suohkanat/gielddat galget gokčat sámegiela ja vierrogielaid dulkoma goluid suohkandearvvašvuođabálvalusas, dás maiddái dulkoma goluid fástadoaktáriid ja eará dearvvašvuođabargiid luhtte, geaiguin suohkanis lea doaibmasoahpamuš. Fástadoaktárat ožžot doavtterbálvalusa Normaltariffa lassimávssu mearrádusaid 7 mielde lassimávssu dan ovddas go gollá eambbo áigi dulkoma geažil.

Sihke suohkandearvvašvuođabálvalusas ja spesialistadearvvašvuođabálvalusas gusket dulkon ja golut dulkomii buohkaide geain lea váilevaš dárogielmáhttu ja geaidda árvvoštallojuvvo dárbbašlaš lágidit gulahallama dulkka bokte, beroškeahttá man guhká ležžet orron riikkas. Dat mearkkaša ahte dulka galgá geavahuvvot dárbbu mielde, maiddái olbmuide geat leat guhká ássan riikkas. Resurssat dulkomii berrejit leat oassin doaibmaplánain ja bušeahtain, eai ge ráddjejuvvot dušše ovdamearkka dihte IMDi integrerendoarjaga meriid mielde.