Buorre dulkonskihkka

Doaba buorre dulkonskihkka muitala mo dulka galgá láhttet ja doaimmahit iežas barggu. Dát boahtá ovdan fidnoehtalaš vuođđonjuolggadusain, mat galget suodjalit sihke dulkka ja dulkageavaheaddji.

Dulkan definerejuvvon olmmoš

«... guhte dadjá njálmmálaččat, ja eará gillii, olbmo dajaldagaid eará guldaleddjiide dan seammás go dajaldagat daddjojuvvojit» (Ozolins 1991).

 

«Dulka ferte máhttit guokte giela hui bures, sus galgá leat buorre servodatmáhttu ja dulkonteknihkalaš gelbbolašvuohta. Dulka galgá maiddái deavdit dulkaehtalaš prinsihpaid   bealátkeahtesvuođa hárrái ja oskkáldasat dulkot dan mii daddjojuvvo. Son ferte dasa lassin leat láddan ja sus galget leat gierdevašvuođa ja jávohisvuođa fuolalaš návccat.»

(Temagihpa 2, kommunikasjon via tolk. Utlendingsdirektoratet ISBN: 82-427-0425-2).
 

Dulkkaid fidnoehtalaš njuolggadusat:

 §1. Dulka ii galgga badjelasás váldit doaimmaid jus sus ii leat dárbbašlaš gelbbolašvuohta

 §2. Dulka ii galgga badjelasás váldit doaimmaid main lea bealálaš (inhabiila)

 §3. Dulka galgá leat bealátkeahttá ii ge diktit iežas guottuid dahje oaiviliid váikkuhit barggu

 §4. Dulka galgá dulkot sisdoalu buot das mii daddjojuvvo; ii maide čiehkat, ii maide lasihit ii ge maide rievdadit

 §5. Dulkkas lea jávohisvuođageatnegasvuohta

 §6. Dulka ii galgga vuoittu dihte dahje eará ulbmiliin boastut geavahit dieđuid maid lea ožžon dulkoma bokte

 §7. Dulka ii galgga dulkondilálašvuođas bargat maidege eará go dulkot

 §8. Dulka galgá dieđihit jus dulkon ii sáhte bealuštahtti láhkái čađahuvvot

 

Dulkonehtalaš vuođđonjuolggadusat gusket formálalaččat dulkkaide geat doaimmahit iežaset doaimma stáhtadohkkeheami vuođul, muhto berrejit leat njuolggadussan buohkaide geat dulkojit, beroškeahttá das lea go barggaheaddji almmolaš eiseváldi, ealáhusdoalli vai priváhta olmmoš.

Dearvvašvuođabargin sáhtát don vuordit ahte dulkkat, maiguin dearvvašvuođadoaimmahagat leat dahkan soahpamuša, bures dovdet buori dulkonskihka njuolggadusaid ja iežaset rolla dulkan.

Doaba buorre dulkonskihkka lea njuolggadus mii muitala mo dulka galgá láhttet ja doaimmahit iežas barggu. Stáhta dohkkehan dulkkaid dohkkehanortnegis ja dulkageahččaleami 6.6.1977 ortnega § 5 mielde geatnegahttojuvvojit stáhta dohkkehan dulkkat doaimmahit iežaset barggu buori dulkonskihka mielde. Buori dulkonskihka njuolggadusaid lea ráhkadan bargojoavku man Gielda- ja guovlludepartemeanta (dalle Gielda- ja bargodepartemeanta) lei nammadan.

Njuolggadusaid berrejit buohkat čuovvut, geat doaimmahit dulkonbarggu, beroškeahttá lea go barggaheaddji almmolaš eiseváldi, ealáhusdoalli vai priváhta olmmoš.

Buori dulkonskihka njuolggadusat (PDF dárogillii)